Næsta stig
Fyrir kennara

Bekkir í Næsta stigi

Kennarahlutinn er smíðaður en ekki kominn út. Hann fer af stað með skólatilraun haustið 2026, á undan almennri útgáfu. Síðan hér að neðan lýsir því sem er tilbúið og virkar, svo skóli geti metið hvort þetta eigi erindi við hann.

Kennari býr til bekk, sér hvernig hverju barni gengur og setur kafla fyrir hópinn. Óvenjulegast er hvað fer ekki á netið: nöfn nemenda eru aldrei send neitt. Þau eru aðeins til í síma eða spjaldtölvu kennarans sjálfs.

Ert þú kennari og vilt vera með í tilrauninni? Þá vil ég heyra í þér. Það sem er enn ógert er talið upp neðst, hreinskilnislega.

Hvað bekkur er

Bekkur er sex stafa kóði og listi af sætum. Ekkert annað. Kóðinn er settur saman úr bókstöfum og tölum sem ekki er hægt að rugla saman, svo núll og O, einn og I eru aldrei með. Hver bekkur tekur mest 40 sæti.

Sæti er ekki nemandi. Sæti er merking eins og 07 eða 3A-07, og hún þarf alltaf að innihalda tölustaf. Það er viljandi: það kemur í veg fyrir að nafn sé notað sem sætismerking, líka óvart.

Að búa til bekk

  1. Opnaðu Stjórnun í forritinu

    Yfirlit, þá Stjórnun, þá Kennari. Þessi hluti er læstur með PIN foreldris eða kennara ef PIN hefur verið sett.

  2. Gefðu bekknum nafn

    Til dæmis „6. bekkur A“. Þetta nafn er þitt eigið vinnuheiti á bekknum og er ekki barnaupplýsingar.

  3. Þú fær sex stafa kóða

    Kóðinn er það eina sem nemendur þurfa. Skrifaðu hann á töfluna.

Um leið og bekkurinn er til fær tækið þitt lykil sem sannar að þú sért kennarinn. Aðeins tæki með þennan lykil getur skoðað nemendalistann, sett kafla eða eytt bekknum. Kóðinn einn nægir til að tengjast, en hann veitir engan aðgang að því sem kennarinn sér.

Hvernig nemandi tengist

  1. Foreldri eða kennari opnar Bekkur á tæki barnsins

    Þetta skref er læst á bak við PIN þegar PIN er sett, svo barn tengist ekki bekk upp á sitt einsdæmi.

  2. Kóðinn er skrifaður inn

    Sex stafir af töflunni.

  3. Sæti er valið úr lista

    Barnið velur sætisnúmer. Það er enginn textakassi hér og því ekkert svæði þar sem barn gæti skrifað nafn sitt inn.

Eftir það sendir tæki barnsins stutta talnayfirlit til bekkjarins þegar barnið vinnur, með takmörkun á tíðni. Kennarinn sér sætið birtast í listanum þegar hann uppfærir hann.

Hvað kennarinn sér

Fyrir hvert sæti sýnir listinn:

  • Fjölda dæma sem leyst voru í dag og í þessari viku
  • Hvaða kafla barnið er í núna
  • Stig barnsins og bekkjarstig
  • Færniþætti sem barnið er fast á, mest tíu í einu
  • Framvindu innan kafla og hvort kaflaprófið er klárað

Þetta er nóg til að sjá hver er á eftir, hver þarf hjálp með hvað, og hver er búinn og gæti fengið meira. Það er ekki nóg til að endurgera hvað barnið skrifaði.

Nöfn: kennarinn getur skrifað nafn við hvert sæti í sínu eigin tæki, til að listinn sé læsilegur. Þessi nöfn eru vistuð eingöngu í tæki kennarans og eru aldrei send til þjónsins. Ef kennarinn skiptir um tæki fylgja nöfnin ekki með. Það er meðvituð ákvörðun: nöfnin eru einmitt það sem á hvergi að vera nema hjá kennaranum sjálfum.

Að setja kafla

Kennarinn getur sett einn kafla fyrir allan bekkinn, eða annan kafla á einstakt sæti. Sætisstillingin gengur framar bekkjarstillingunni. Barnið sér þá kaflann sem kennarinn valdi á Í dag skjánum, með hnappi beint inn í efnið.

Í dag er þetta einn kafli í einu. Fjölval á köflum, vikuplan og tímaáætlanir eru ekki komin, sjá neðst.

Að fjarlægja nemanda eða eyða bekk

Kennarinn getur tekið sæti út úr bekknum, og þá fara bæði talnayfirlitið og kaflastillingin fyrir það sæti. Kennarinn getur líka eytt öllum bekknum, og þá er hann horfinn af þjóninum. Hvorugt hefur áhrif á framvindu barnsins í tækinu þess: barnið heldur öllu sínu, bekkurinn er einungis sameiginlega yfirlitið.

Hvað fer á netið, nákvæmlega

Þjónninn tekur aðeins við fyrirfram skilgreindum lista af tölum. Allt annað sem tæki kynni að senda er einfaldlega hent. Listinn er: bekkjarstig, stig, kafli í gangi, fjöldi leystra dæma í dag, í viku og alls, fjöldi kláraðra lexía, framvinda innan kafla, allt að tíu færniþættir sem barnið er fast á, og dagsetning með dagsnákvæmni sem þjónninn stimplar sjálfur.

Þar eru engin nöfn, enginn texti sem barnið skrifaði, engar myndir af skrift, engar klukkustundir eða mínútur, og engin tækjaeinkenni. Sætismerking þarf að innihalda tölustaf einmitt til að hún geti ekki verið nafn.

Handskrift barnsins fer aldrei í bekkinn. Hún er metin sér og myndin er aldrei vistuð, hvorki hjá okkur né hjá kennaranum.

Nánar um persónuvernd →

Það sem er ekki komið

Þetta er fyrsta útgáfa kennarahlutans og hún er meðvitað lítil. Þessir hlutir eru ekki til í dag og það er rétt að segja það hreint út:

  • Fjölval á köflum og vikuplan fyrir bekkinn
  • Tímaáætlanir um hversu langan tíma efni tekur
  • QR kóði til að tengjast, í stað þess að skrifa kóðann
  • Tilkynning til kennarans um leið og nemandi tengist

Hvert þetta stefnir

Forritið býr dæmin til jafnóðum, eftir því hvar barnið er statt. Það þýðir að kennari getur haft áhrif á efnið sjálft, ekki bara á hvaða kafli er opinn, og þangað er stefnan tekin:

  • Kennarinn stýri því hvers konar dæmi bekkurinn fær: samhengi, orðalag, þyngd
  • Kennarinn raði köflum eftir sinni eigin kennsluáætlun frekar en okkar röð
  • Kennarinn leggi inn sín eigin dæmi og láti þau ganga inn í daglega skammtinn

Ekkert af þessu er komið. Röðin ræðst af því hvað kennarar í tilrauninni segja að vanti mest, og þess vegna er tilraunin á undan almennu útgáfunni.

Verð fyrir skóla

Heimilisáskrift verður einföld mánaðargreiðsla. Fyrir skóla verður verðið miðað við fjölda nemenda, með þrepum þannig að heill árgangur eða heill skóli kosti minna á hvern nemanda en einstakur bekkur. Skólar á Íslandi verða fyrstir.

Tölurnar eru ekki fastar og verða settar í samráði við skólana í tilrauninni. Tilraunin sjálf kostar ekkert. Vinnslusamningur samkvæmt GDPR fylgir, enda vinnur skólinn þá með okkur um gögn nemenda.

Ef þú ert kennari og vilt hafa áhrif á hvað kemur næst, þá er það gagnlegasta sem þú getur gert að segja mér hvernig þú notar þetta í raun.